ԹՀԹ 15-րդ Պատգամաւորական ժողովի դիւանի առաջին հաղորդագրութիւնը

 
 
Այսու համայնքիս յարգելի Ժողովրդին յայտնում ենք, որ Թեհրանի հայոց թեմի նորընտիր 15-րդ Պատգամաւորական ժողովի անդրանիկ նիստը գումարւեց ուրբաթ օրը, թւականիս 14 դեկտեմբերին՝ Ազգային Առաջնորդանի դահլիճում, Թեմիս Առաջնորդ Տ. Սեպուհ արք. Սարգսեանի հրաւէրով ու նախագահութեամբ:
Պատգամաւորները առաւօտեան Ս. Սարգիս եկեղեցում ներկայ եղան Ս. Պատարագին եւ հաղորդութիւն ստանալուց յետոյ սրահ բարձացան քրիստոնէական զօրութեամբ լիցքաւորւած սկսելու համայնքիս կողմից իրենց վստահւած նւիրական ու պատասխանատու ծառայութիւնը:
Ժողովն սկսւեց Տէրունական աղօթքով, որից յետոյ Սրբազան Հօր կողմից որպէս առժամեայ դիւան հրաւիրւեցին ժողովականներից երիցագոյն եւ կրտսերագոյն անդամներ՝ պրն. պրն. Վարդան Վարդանեանն ու Սեդրակ Գոջամանեանը: Նորընտիր Պատգամաւորները իրենց մանդատներն ստացան մէկ առ մէկ, որից յետոյ հաստատւելով ժողովի կազմը ընտրւեց քւէախոյզ մարմին բաղկացած հետեւեալ անհատներից՝ պրն. պրն. Արբի Սարգսեան, Գուրգէն Յարութիւնեան, Էդիկ Մեհրաբի եւ տկն. Կարինէ Բալըքչեան, այնուհետեւ Ժողովն անցաւ մնայուն դիւանի ընտրութեանը, ընդ որում Պատգամաւորական ժողովի 15-րդ շրջանի դիւանը կազմւեց ըստ հետեւեալի՝
– պրն. Գէորգ Վարդան` ա ատենապետ,
– պրն. Նորայր Արամեան` բ ատենապետ,
– պրն. Արմէն Հայրապետեան` ա ատենադպիր,
– պրն. Էլիպս Մասեհեան` բ ատենադպիր:
Դիւանի ընտրութիւնից յետոյ Ժողովն ունկնդրեց Ն.Ս.Օ.Տ.Տ. Արամ Ա. Կաթողոկոսի պատգամը, որտեղ Վեհափառ Հայրը իր շնորհաւորանքներին զուգահեռ կարեւորում էր Պատգամաւորական ժողովի անելիքները ներհամայնքային եւ համազգային ասպարէզներում: Ապա, թեմիս բարեխնամ առաջնորդ Տ. Սեպուհ արք. Սարգսեանը իր պատգամ ելոյթով հանդէս եկաւ ու մանրամասնօրէն բացատրեց համայնքիս Ազգային իշխանութեան կառոյցում առկայ մարմինների եւ ժողովների պատասխանատւութիւնների շուրջ եւ իր խօսքերով ուրւագծեց ժողովիս ապագայ ուղու մասին իր տեսակէտները, որտեղ կարեւորութեամբ էր ընդգծւած Հայոց Առաքելական եկեղեցու հիմնական ուղղւածութիւնը ժողովրդի ծառայութեան եւ դաստիարակման ասպարէզներում, Սրբազան Հայրն իր խօսքերում որպէս յաջողութեան արգասիք մատնանշեց՝ միասնական աշխատանքը, միմեանց հանդէպ սէրն ու հանդուրժողականութիւնը եւ լսելու կարողութիւնը: Նա պատասխանատուների առաջնային նպատակը համարեց երիտասարդ սերնդին ուշադրութիւն դարձնելն ու կարեւորութեամբ անդրադարձաւ համաշխարայնացման այս յարափոփոխ օրերին նրանց ազգային-կրօնական դաստիարակութեամբ օժտելուն: Ու դրան առընթեր շեշտեց Հայ Դատի հետապնդման ուղղութեամբ տարւելիք աշխատանքների յարատեւութեան եւ ընդարձակման կարեւորութիւնը:
Ժողովն իր օրակարգի վերջին բաժնում մտքերի փոխանակման կարգով զբաղւեց ներկաների կողմից կարեւորւող եւ շուտափոյթ վերահասութեան արժանի հարցերի շուրջ, որտեղ հնչեցին հետեւեալ մտքերը՝
ա) մտահոգութիւններ արծարծւեցին Կրթական խորհրդի կողմից, կրթական համակարգում ծաւալած որոշ աշխատանքների ու դրսեւորած աշխատանքային ոճի նկատմամբ,
բ) մտահոգութիւններ արտայայտւեցին Հաշւեքննիչ մարմնի վերջին ամիսների ընթացքում Պատգամաւորական ժողովի նիստերից բացակայութեան շուրջ:
գ) շեշտւեց նախկին որոշումների իրագործմանը հետեւելու կարեւորութիւնը ու դրանց արտացոլման ճիշտ գործընթացքի կարեւորութիւնը:
դ) խօսւեց թեմիս կանոնագրութեան ու նաեւ ընտրական օրէնքների վերանայման կարեւորութեան շուրջ:
ե) մատնանշւեց «Սասուն» մանկապարտէզի շինարարական աշխատանքների աւարտման եւ նրա տեղափոխման աշխատանքների շուրջ առկայ անորոշութեան անպատեհութիւնը: Ներկայացւած հարցերի ու փոխանակւած մտքերի արդիւնքում Ժողովը հանգեց հետեւեալ եզրակացութիւններին, որոնք ներկայացւում են ի գիտութիւն համայնքիս սիրելի ժողովրդին՝
ա) Պատգամաւորական ժողովն իր երախտապարտ շնորհակալութիւններն է յայտնում համայնքիս գիտակից ժողովրդին, որն իր մասնակցութեամբ կարեւորեց ներհամայնքային այս կարեւոր հանգրւանը:
Հաւատարիմ մնալով իրեն վստահող համայնքի դրսեւորած կամքին՝ նա (ՊԺ) կը շարունակի նախորդ շրջաններից իրեն փոխանցւած փորձառութիւններն ու վարկը ի գործ դնել, օժանդակելու ազգային կառոյցում տքնաջան աշխատանք ծաւալող միւս մարմիններին ու ժողովներին՝ թեմի իրականութիւնների եւ կարողութիւնների սահմաններում, մեր սիրասուն ժողովրդի համար կայուն ու բարւոք կեանք ապահովելու հեռանկարով:
Հակառակ որոշ սխալ եւ մեր աւանդոյթներին անյարիր տեսակէտներին, Պատգամաւորական ժողովն իր պարտքն է համարում հետապնդել համայնքիս կողմից ներկայացւած խնդիրներն ու դժւարութիւնները: Նա պիտի փորձի գործադիր մարմինների հետ խորհրդակցութիւնների շնորհիւ վեր հանել իրագործւող ծրագրերի առաւելութիւններն ու թերութիւնները, որի արդիւնքում հնարաւոր կը դառնայ դիպուկ ռազմավարութիւնների եւ իրագործելի ծրագրերի մշակումը:
բ) Ի նկատի ունենալով Հաշւեքննիչ մարմնի յոյժ կարեւոր հանգամանքը որպէս Պատգամաւորական ժողովի վերահսկիչ բազուկի, հարկաւոր է օր առաջ ծանօթանալ ու լուծում տալ բոլոր այն անհարթութիւններին, որոնք պատճառ են դարձել նրա (ՀՄ) սահուն գործընթացքի դանդաղեցմանը եւ լիարժէք ներկայութեան բացակայութեանը թեմիս աշխատանքային առօրեայում:
գ) Նախկին Պատգամաւորական ժողովի որոշումներին անդրադառնալով հետեւել դրանց ճշգրիտ իրագործմանը եւ նոր գործընթացքի առկայութեան դէպքում ստանալ ժողովիս վերահաստատումը:
Ժողովի աւարտին Դիւանին յանձնարարւեց համապատասխան մարմինների ու անձնաւորութիւնների հետ հանդիպումներ կազմակերպելով հարկն ու պատշաճը տնօրինել եզրակացութիւնների իրագործման ու դրանց հետապնդման ուղղութեամբ:
 
«Յոյս» թիւ 138
12 Յունւար 2013
 

    Tags: , , ,

    Leave a Reply

    Your email address will not be published. Required fields are marked *